Christmas Fight: పండ‌గ‌ల‌కు పెద్ద సినిమాలు విడుద‌ల కావ‌డం కొన్ని సంవ‌త్స‌రాల నుండి ఆన‌వాయితీగా వ‌స్తుంది. సంక్రాంతి, దసరా, క్రిస్మ‌స్ పండ‌గ‌ల‌కి పెద్ద సినిమాలు బాక్సాఫీస్ వ‌ద్ద సంద‌డి చేయ‌డం కామ‌న్. ఈ పండ‌గ‌ల‌కి మూడుకి పైగా సినిమాలు పోటీప‌డుతుంటాయి. ఒక్కోసారి అన్ని సినిమాల‌కి మంచి ఆద‌ర‌ణ ద‌క్కుతుంది. మ‌రి కొన్ని సార్లు కొన్ని సినిమాలు నిరుత్సాహ‌ప‌రుస్తుంటాయి. అయితే ఈ ఏడాది క్రిస్మ‌స్‌కి భారీ సినిమాలే రిలీజ్ అవుతుండ‌గా, ఇప్పుడు ఈ సినిమాల‌పై అంచ‌నాలు ఓ రేంజ్‌లో ఉన్నాయి. క్రిస్మ‌స్‌కి రిలీజ్ అవుతున్న సినిమాల లిస్ట్ చూస్తే ముందుగా విక్టరీ వెంక‌టేష్ మూవీ సైంధ‌వ ఉంది. హిట్ 2 ఫేమ్ శైలేష్ కొలను దర్శకత్వంలో వెంక‌టేష్ 75వ చిత్రంగా ఈ మూవీ రూపొందుతుంది. డిసెంబర్ 22న ఈ చిత్రాన్ని రిలీజ్ చేయ‌బోతున్న‌ట్టు మేకర్స్ ఇప్పటికే ప్రకటించారు.
ఇక ఇటీవ‌ల దసరా వంటి బ్లాక్ బస్టర్ హిట్ కొట్టి ఇప్పుడు డెబ్యూ డైరెక్టర్ శౌర్యువ్ దర్శకత్వంలో హాయ్ నాన్న అనే సినిమా చేస్తున్నారు నాని. ఈ చిత్రం ఎమోషనల్ డ్రామాగా రూపొంద‌నుండ‌గా, ఇందులో సీతారామం ఫేమ్ మృణాల్ ఠాకూర్ క‌థానాయిక‌గా న‌టిస్తుంది. డిసెంబర్ 21న ఈ చిత్రాన్ని రిలీజ్ చేస్తామని ఇప్పటికే మేకర్స్ అనౌన్స్ చేశారు. ఇక రీసెంట్‌గా క్రిస్టమస్ రేసులోకి వచ్చిన మరో హీరో నితిన్. వక్కంతం వంశీ దర్శకత్వంలో నితిన్ హీరోగా ఎక్స్ట్రా- ఆర్డినరీ మ్యాన్ అనే చిత్రం రూపొందుతుండ‌గా, రీసెంట్‌గా ఫ‌స్ట్ లుక్ విడుద‌ల చేసి మూవీని డిసెంబర్ 23న రిలీజ్ చేస్తున్నట్లు కూడా ప్రకటించారు.
మరోవైపు హిట్, ఫ్లాపుల‌తో సంబంధం లేకుండా వ‌రుస సినిమాలు చేస్తూ పోతున్న సుధీర్ బాబు జ్ఞాన సాగర్ ద్వారక దర్శకత్వంలో హ‌రోం హ‌ర అనే చిత్రం చేస్తున్నారు. పాన్ ఇండియా మూవీగా రూపొందుతున్న ఈ చిత్రాన్ని డిసెంబర్ 22న రిలీజ్ చేయ‌నున్నారు. ఇక బాలీవుడ్ నుండి చూస్తూ షారూఖ్ ఖాన్ ప్ర‌ధాన పాత్ర‌లో రూపొందుతున్న డుంకీ చిత్రాన్ని క్రిస్మ‌స్ కానుక‌గా డిసెంబర్ 22న రిలీజ్ చేయ‌బోతున్నారు. ప‌ఠాన్ వంటి బ్లాక్ బస్టర్ హిట్ త‌ర్వాత షారూఖ్ ఖాన్ చేస్తున్న ఈ సినిమాపై అంచ‌నాలు ఓ రేంజ్‌లో ఉన్నాయి. మొత్తానికి క్రిస్మ‌స్ కానుక‌గా మంచి సినిమాలే ప్రేక్ష‌కుల ముందుకు రాబోతుండ‌గా, ఇందులో ఎన్ని హిట్ కొడ‌తాయి, ఎన్ని ఫట్‌మంటాయి అనేది చూడాలి.
