Bigg Boss: బుల్లితెర ప్రేక్ష‌కుల‌కి మంచి వినోదం పంచుతున్న బిగ్ రియాలిటీ షో బిగ్ బాస్ తెలుగులో దూసుకుపోతుంది. ఇప్ప‌టికే మన ద‌గ్గ‌ర ఆరు సీజ‌న్స్ తో పాటు ఒక ఓటీటీ సీజ‌న్ కూడా పూర్తి చేసుకొని ఇప్పుడు ఏడో సీజ‌న్‌తో అలరించేందుకు సిద్ధ‌మైంది. గ‌త సీజ‌న్ కాస్త నిరాశ‌ప‌ర‌చ‌డంతో ఈ ఏడాది బిగ్ బాస్ షో ఉండ‌ద‌ని అందరు అనుకున్నారు. కాని ఇటీవ‌ల వ‌రుస ప్రోమోలు రిలీజ్ చేస్తూ సీజ‌న్ 7 మొద‌లు కావ‌డానికి మ‌రెంతో టైం లేద‌నే హింట్ ఇచ్చారు. ఇక బిగ్ బాస్ ప్రియులు ఎప్పుడెప్పుడు ఈ షో మొద‌ల‌వుతుందా అని అందరు ఆస‌క్తిగా ఎదురు చూస్తున్న స‌మ‌యంలో బిగ్ బాస్ షోని ఆపేయాలంటూ హైకోర్ట్ నోటీసులు జారీ చేసి పెద్ద షాక్ ఇచ్చింది.
బిగ్ బాస్ షోని నిలిపివేయాలంటూ పిటిషన్‌ దాఖలైన నేపథ్యంలో హైకోర్ట్ విచారణ చేపట్టి కేంద్ర, రాష్ట్ర ప్రభుత్వాలకు, అలాగే `స్టార్ మా`తోపాటు నాగార్జునకి కూడా నోటీసులు జారీ చేసింది. అంతేకాదు ఈ పిటిషన్‌పై కౌంటర్ దాఖలు చేయాలని కూడా కోరింది. కేసుకు సంబంధించిన విచారణ నాలుగు వారాల‌కి వాయిదా వేయ‌గా, ఆ లోపు ప్రభుత్వం, స్టార్ మా నిర్వహకుల నుంచి కౌంటర్ దాఖలు చేయాలంటూ హైకోర్ట్ ఆదేశాలు జారీ చేసింది. మ‌రి కొద్ది రోజుల‌లో షో మొద‌లు కానుంద‌నుకుంటున్న స‌మ‌యంలో ఇలాంటి నోటీసులు రావ‌డంతో అందరు ఆశ్చ‌ర్యానికి గుర‌య్యారు. అయితే గతంలోనూ బిగ్ బాస్‌పై ఇలాంటి పిటిషన్‌లు దాఖలయిన‌ప్ప‌టికీ షోని ఎవరూ ఆపలేకపోయారు.
మ‌రి ఏడో సీజ‌న్‌కి బ్రేకులు ప‌డ‌తాయా లేదంటే య‌ధావిధిగా సాగుతుందా అనేది చూడాలి. ఇక ఇదిలా ఉంటే బిగ్‍బాస్ ఆరు సీజన్లలో పాల్గొన్న స్టార్లతో ‘బిగ్‍బాస్ షైనింగ్ స్టార్స్’ పేరుతో ఓ ఎంటర్టైన్మెంట్ ఈవెంట్ చేస్తుంది స్టార్ మా. ఈ షోలో నాగార్జున కూడా సంద‌డి చేశారు. ఇటీవ‌ల ఇందుకు సంబంధించిన ప్రోమో కూడా విడుద‌లైంది. ఈ ఆదివారం (జూలై 30) సాయంత్రం 6 గంటలకు ఈ ఈవెంట్ ప్రసారం కానుందని స్టార్ మా వెల్లడించింది. ఈ ఈవెంట్ సుదీర్ఘంగా ఉండే అవ‌కాశం ఉండ‌గా ఇది ప్రేక్ష‌కుల‌కి మంచి ఎంటర్టైన్మెంట్ అందించ‌నుంద‌ని అంటున్నారు.
