Engagement: గ‌త కొద్ది రోజులుగా వరుణ్ తేజ్, లావణ్య త్రిపాఠిల ప్రేమ, పెళ్లికి సంబంధించి అనేక ప్ర‌చారాలు న‌డుస్తున్నా కూడా ఎవ‌రు దీనిపై స్పందించ‌డం లేదు. వరుణ్ తేజ్ దీనిపై పూర్తిగా సైలెంట్‌గా ఉన్న‌ప్ప‌టికీ లావణ్య త్రిపాఠి అప్పుడ‌ప్పుడు ఖండిస్తూ వ‌చ్చింది. అయితే ఆ ప్ర‌చారాలే ఇప్పుడు నిజం కాబోతున్నాయి. ఈ రోజు వరుణ్ తేజ్, లావణ్య త్రిపాఠి ఎంగేజ్‌మెంట్ జ‌ర‌గ‌బోతున్న‌ట్టు వరుణ్ తేజ్ టీమ్‌ అధికారికంగా ప్రకటించింది. దీంతో ఈ విష‌యం ఇప్పుడు ట్రెండ్‌ అవుతుంది. ఈ రోజు సాయంత్రం హైదరాబాద్ లోని వరుణ్ తేజ్ ఇంట్లో వీరిద్దరి నిశ్చితార్థ వేడుక ఘ‌నంగా జ‌ర‌గ‌నుండ‌గా, ఈ కార్య‌క్ర‌మానికి అత్యంత సన్నిహితులు, ఇరు కుటుంబ సభ్యులు హాజ‌రు కానున్నార‌ట.
ఇండ‌స్ట్రీకి చెందిన ప‌లువురు స‌న్నిహితుల‌ని కూడా వారు ఆహ్వానించిన‌ట్టు స‌మాచారం అందుతుంది. అల్లు అర్జున్ టూర్ ముగించుకొని రీసెంట్‌గా హైద‌రాబాద్‌లో అడుగుపెట్టాడు. ఈ వేడుక కోసమే కాస్త ముందుగా వ‌చ్చాడ‌ని చెబుతున్నారు. ఇక పుష్ప-2 షూటింగ్‌లో బిజీగా ఉన్న అల్లు అర్జున్ వరుణ్ ఎంగేజ్‌మెంట్ వేడుకకు హాజరకానున్నారని తెలుస్తోంది. మెగాస్టార్ చిరంజీవి, సురేఖ, రామ్ చరణ్, ఉపాసనలతో పాటు మెగా, అల్లు కుటుంబ సభ్యులు సైతం ఈ నిశ్చితార్థ వేడుక‌లో పాల్గొంటారు. ఇక ఏడాది లోపే వీరిద్దరి వివాహం ఉంటుంద‌ని స‌మాచారం.
వరుణ్ తేజ్ సోదరి నిహారిక, లావణ్య బెస్ట్ ఫ్రెండ్స్అనే విష‌యం తెలిసిందే. వీరిద్ద‌రు కలిసి జిమ్ చేసేవారు. అలా నిహారిక ద్వారా వరుణ్-లావణ్య ఒకరికొకరు పరిచయమయ్యారని టాక్. కలిసి సినిమాల్లో నటించక ముందు నుండే వీరిద్దరి మధ్య ప్రేమ చిగురించింద‌ని మిస్ట‌ర్ సినిమాతో మ‌రింత స్ట్రాంగ్ అయింద‌ని అంటున్నారు. లావణ్య త్రిపాఠి.. నిహారిక పెళ్లిలో సైతం సంద‌డి చేసిన విష‌యం తెలిసిందే. మొత్తానికి వరుణ్ తేజ్ ఓ ఇంటివాడు అవుతుండ‌డంతో అభిమానులు, సినీ సెల‌బ్రిటీలు శుభాకాంక్ష‌లు తెలియ‌జేస్తున్నారు. ఇక వరుణ్ తేజ్ ప్రస్తుత సినిమాల విష‌యానికి వ‌స్తే.. ఆయన ప్రవీణ్ సత్తారు తెరకెక్కిస్తున్న `గాండీవధారి అర్జున` అనే చిత్రంలో నటిస్తున్నారు. యాక్షన్ థ్రిల్లర్ గా రూపొందుతున్న ఈ మూవీలో వరుణ్ తేజ్ కి జంటగా సాక్షి నటిస్తుంది. మిక్కీ జే మేయర్ సంగీతం స‌మ‌కూరుస్తున్నారు.
